dinch' tiroir del tape d' l arriere cuisine

savez quand qu on est tchiot qu in a l' tape del cuisine au niveau du nasiau, in vo les chosses pas parel qu in les vo asteure ...
D' ailleurs cha nous arvient nos souv'nirs comme si chéto un peu embrumé, un peu comme lors d un rével, d un seul coup in s artrouffe propulsé dins not' infance, à arviffe un souv'nir trés précis , qu in soupçonno pas qu in pourro s in rap'ler plus d eune quarantaine d années après ...................

quand que j' m innuyo, j allo souvint vire m' mère faire à minger , chéto pas des cuisines hypermodernes comme in peut asteure trouver ,j' cit'rais pas d' noms......... chéto eune tchiote tape in bo qui éto au miyeu del cuisine, ou plutot d' l arriere cuisine

ouais pasque l' cuisine avec ch' fourneau chéto situé dans l' arriere cuisine, alors que l' cuisine chéto l' pieche du qu in mingeo, in continue aprés chéto l' salle à minger, du qu in mingeo trés rar'mint, mais qui a cangé d' nom et d' mobilier aprés pour s appeler le salon l' jour qu in a comminché à s équiper "moderne" eune fo l' télé arrivé al' mason, et pour terminer l'pieche ed devant du que chéto l' bureau d' min père et là aussi qu in faijo ché repas d' la noel .........

par in arvenir al' tchiote tape in bo, j' me souviens qu ale éto rectangulaire, in s y metto au maximum à quat' personnes autour ; d ' un coté yavo un tiroir, mais là chéto un tiroir qui éto interdit à ché zinfants vu qu' d'dins y avo qu ' des ustensiles qui pouvotent bin faire du mau à tes dogts .....
yavo ,ch' l économe, ch' fameux coutiau pour éplucher ché carottes, eune paire d' tchiots couteaux d' cuisine que M'man ale sorto quand qui fallo éplucher ché légueumes d' sul chte fameusse tape mais in mettant à l avinche eune paire d' feules d' journal d' la voix du nord, pour que, à la fin d l épluchache , ale puisse tout argrouper d un coup, tout froisser, et met' al' poubelle
ouais pasque ché nous in él'vo pas d' bietes
pitits coutiaux, économes, sans oublier ch' coutiau qui servo à artirer ch' trognon del pomme , les paires d' ciseaux, j' parle del paire normale, mais aussi celle qui arsemblo plus à un gros sécateur qu à eune paire d' ciseaux, j' veux parler del paire qui servo à découper l' volaille ..........
dinch te tiroir yavo aussi ché zoreles in plastique qu in sorto et qu in accrocho sul' coté d' ché zassiettes pour pouvoir i met' el' vinaigrette quand qu in mingeo des artichauts ou des moules
yavo aussi un tchiot fouet avec eune manivelle , là chéto pour touiller quand que M'man ale allo faire un gatiau

Pasque ché pas pasque j éto tout juste un peu plus grand quel' niveau del tape que j' voyo pas c' qui s' passo d' sus et cor meme à l INTERIEUR d' plats qui pourtant étotent presque innaccessipes pour mi ................tout cha pasque M'man ale avo eune batt'rie d' saladiers, pitits ou grands in verre transparent, certains diront que ché du pyrex, les zautes d' l arcopal, l important ché qu in voyo à travers