A l'cafe, 5 rue Nungesser

Encore un détal ed'vie d'chez min Pépère Marcel et m'Mémère Georgette. Comme ej' l'a d'jà raconté, mes parints y zallotent souvint vire mes grands-parints alle Cité 40 ed'Grenay. Et té parles d'un voïache, cha comminchot à Note Dame du Mont-Carmel pou finir deux kilomètes pus loin au 5 rue Nungesser (d'ailleurs, si d'na qui voudrott'nt bien allez m'faire eine photo deulle mason, cha m'intéresse).
Malgré tout, à chaque fos, mi, min frère et m'tchiote soeur, ein étot toudis ravis d'artourner là pou l'deuxième ou trosième fos dins l'semaine. Et là, j'compte pas ch'mercredi où ein s'artruvot tertous, cousins, cousines, matantes... pour l'après-midi.
Ein avot chacun ses occupations. Min frère, li, y aimot bien juer dehors avec em'cousine, ou raviser l'télé, em'soeur, alle étot souvint avec em'mère. Et mi, min bonheur, qui fasse biau ou qu'y ait del' pleufe, chétot d'aller à l'cafe. Ein y accédot par eine porte intre l'cuisine et l'salle à minger. Là, y fallot déchinte eine dizaine ed'marches in béton. Et pi y fallot faire gaffe, passque min grand-père y les avot muchées avec du balatum et cha pouvot glicher.
Dins cheulle tchiote pièche-là, y avot pas gramint d'plache. Mi, j'la jamais connu, mais j'cros bien qu'cha servot jusse à intreposer ech'carbon. D'ailleurs, such' mur ed'déhors, y avot eine trappe assez larche pou cha.
Bref, dins l'cafe, y avot d'tout et tout étot bien ringé. Je m'souviens qu'y avot un grand bac à peum'tierres (déch'gardin, bein sûr !), su chés murs, arcouverts à l'peinture blanque (ou de l'chaux, j'ein sais pus rien), des étagères pleines ed'bocaux Le Parfait dins lesquels em'Mémère, alle faijot ses conserfes pou l'année. Je m'souviens core d'ses fameusses poires cuites... Et pi, je m'rappelle aussi ed'toutes chés boutèles vites intreposées là dins un coin, attindant trinquillemint qu'ein les armènent à ch'masagin su l'place ed'Grenay (jord'hui place Daniel Breton) du qu'ein récupérot chés consignes.
Mais, vous vous ein doutez bien, ché pas pour vire tout cha, qu'je m'rindos à l'cafe. Nan, mi j'm'asseyos à terre (y avot core du balatum), et pi dins un coin, y avot eine caisse ed'lifes, des bédés in papier journal, des tchiots formats en noir et blanc. Et là, à l'leumière d'eine ampoule très faible, ej'dévoros des Akim, Banzaï, Vigor... Jusqu'à c'que min grand-père, in passant à côté de ch'témoin d'l'interrupteur, y s'rinde compte qu'eulle leumière de'l cafe alle étot allumée. A ch'momint-là, i ouvrot l'porte et i m'demindot d'armonter lire mes lifes ein haut. Ej l'intinds core dire "Ein n'doit pas "brûler" del' leumière pou rien, ein l'paye ech'courant !" Y avot raison min Pépère mais mi, j'avos querre m'artreuver tout seu dins l'cafe. Et mânme si ché pas facile ed' parler d'eine odeur, y avot ein plus un parfum d'humidité qu'j'adoros. Em'mère alle m'dijos qeuche sintot el "murgalé", min grand-père li, i dijot que j'sintos el kien frèque. L'aute coup, su ein marché aux puches, j'artreufe un vieux Vigor. El' premier réflexe qu'j'a eu, ché d'porter ch'life à min nez (ech l'homme qui l'vindot y m'a d'ailleurs ravisé vec des yiux d'merlan frit), pou vire si cha sintot core el murgalé. Et ben ouais, el mânme odeur ! Et là je m'sus dit : "Et ben té vos min fiu, core ein voyache pas quère !"