le tricotache suite

et ensuite, in avo un aperçu de s' qu on allo vive plus tard mais qu in l' savo pas cor : ché suive patiemment eune femme dans un magasin qui nous interesse pas ......

alors té voyo t' mère qu ale preno eune p'lote , qu ale l a toucho, enfin j' vous parle de celles qui étotent dins des bacs sul' devant du comptoir , ale les zarmettotent , ale zalotent plus loin, ale zarvenotent ...mon diu si in nous avo dit à nous ché zhommes que cha pourro et' not' av'nir , in n a eune paire qui , à ch' t ache là aurotent te dit qui zallotent jamais s' marier ........

aprés m' mère ale raviso toutes ché p'lotes ringées par couleur dans des especes d étagères derriere ch' fameux comptoir, limite symbolique mais réelle entre l' vendeusse et ché clientes ...
fallo in plus et' patient pasque , in pouvo et' sur qui yavo djà eune dame qu ale exposo c' qu ale avo invie d' faire, qu ale éto pas sure del couleur, qu ale d'mindo l' nompe d' pelottes qu ale auro b'soin al' vendeusse, bin sur que l' couleur qu ale voulo , in n avo pas assez , à accroire que chéto fait d' exprès ............
in plus qui n avo certaines qu in plus chéto d' sacrées babelles, et qu ale racontotent commint cha chéto passé l' tricotache du pull d avant, que l' vendeusse ale faijo semblant d' eus' souv'nir .....bref in avo l' temps d' cogiter dins ch' magasin à mon grand dam, pasque j' trouvo qu in resto justemint pas assez par exempe dinch' magasin Prisunic du cercle d' bruay, du qu in rentrant prés d' l entrée du qui yavo ché paniers in plastique rouche pour faire ché courses dans la partie alimentation, yavo ch' rayon juets ......
ah là in avo jamais l' temps, j avo djà tout...tandis qu à mon Pinguin....l' attente am' semblo lonque aussi pasque cha m interesso pas, et certain'mint que dans m'tiete i devo et' beaucoup plus long qu in vérité
quand qu eune dame ale éto ach' comptoir, cha pouvo cor et' plus long à cause des aiguiles à choisir, grande discussion aussi entre l' cliente et l' vendeusse "croyez pas qu in pourro pas printe un tchiot peu plus grand comme tale d' aiguilles" mi j intindo par exempe "ouais mais du 4 alors"
pour mi chéto du charabia
sans parler d' celles qu ale venotent cacher aprés un motif pour faire du canevas, avec , in vedette dins l' top cinquante, le canevas du que ch' tableau chéto des nymphes qui étotent un peu rontes des cuisses , autour d un lac, avec des cerfs et des biches ...
quand que chéto l' tour dem' manman, j' dis pas cha pasque chéto m'manman, mais cha alo assez vite, ale savo c' qu ale voulo et surtout sin budget, que meme si in a jamais été malheureux, ale suivo toudis d' très près ...........

Pi l' vendeusse ale savo y faire, "ah ché vot' dernier" ...j' vous dis pas commint j éto djà bio quand que j éto tchiot, vous in serotent jaloux .... et meme pour m' faire passer m' n attinte dins ch' magasin ,l' vendeusse am' donno un tchiot cadeau , souvint eune mini boite d' chinq pitits crayons d' couleur , formidape cadeau à l époque, que si t offe cha asteure à un éfant , ché tout juste si té do pas li dire merci d' l avoir accepté .........