les souliers d' min grand père

i les a gardé au moins pu d' trente cinq ans meme quand i est mort i z'étotent pas cor usés. té va m' dire nounours: "té nous raconte eune cacoule" nan ej m'explique. i les metto eune fos par mos pour aller toucher s' pinsion ou quand i éto invité avec m' grand mère. i z'étotent toudis sur l' troisième marche l' montée d'escalier. j'éto impressionné in les véyant bin ouais i caucho du 44. i mesuro presque 1 mete 90.
ej l'avo quer quand j'allo passer eune journée à leur mason, l'après midi, à l'heure du goûté l'été in s'asséyo in d'sous du poirier, i sorto sin coutiau d'sin pantalon d'toile bleu, et i m'éplucho un fruit avec amour et délicatesse qu'ej mingeo avec des tartines d'pains coupés.
quand ej sus artouné à Bruay, in allant faire un tour rue d' Bone ej sus passé devant l' mason comme à l'éto inhabité esse sus aller faire un tour pour raviser à travers ché carreaux vu qu'ale à été rénové in traversant l' voyette, j'ai vu qu'ej poirier n'existo pu, ainsi que l'hortensia, et ché marguerites qui avo au bout du gardin .ej sus arparti avec i pinchemint au coeur.
juste eune dernière cosse avant d' finir. i a toudis un truc qui m'"frappe" quand j'va au cim'tière. i a souvint inscrit sur des plaques: le temps passe, les souvenirs restent. j'en sai pas qui ché qui a inventé l'phrase, mais i avo raison.
j'avo oublié pour celle et ceux du 3 qui connaissent ché masons,comme ale éto trop grante pour eusse ale éto séparée in deux par un mur. ché t'eune polonaise qui vivo dins l' cuisine et l'arrière cuisine. d'quoi ale vivo j'in sais rien ej cro que ché m' grand mère qui l'i faiso sin dîner. sans télé,sans transistor. sin garchon i v'no d' temps in temps i dire bonjour. ale sorto jamais ale est morte dins sin lit. ché min grand père qui l'a découvert in allant i porter du pain.