Les jardinsL' taillette, B. Cocq et S. Colliez
par roger le, 11/09/2005L'taillette
Poème de Bertrand Cocq et Simon Colliez
Ch'est un p'tit bout d'ferale, rond, perché au milieu
Avec un numéro tout bête, "232"
Que j'ai artrouvé hier, in cachant dins'ch'tiroir
Et qui d'un seul momint a rallumé m'mémoire
J't'arvos, y'a juste 20 ans, ch'étot la fin d'l'hiver
T'es venu nous dire "inrevoir", pis t'as imbrassé m'mére
T'as mis t'grosse Canadienne, et su't'n'épaule eut'musette
Et t'es parti à'l'fosse, in fumant t'cigarette
Je ne devos pus t'arvir
À 4h au matin, y'a eu un grand coup d'mine
Et pis après plus rien
Y avot un tué in plus, j'avos un père in moins
Euch'garde, i'est venu nous l'dire, eud' bonne heure au matin
Oh! i'a pas eu d'manière, i'a pas eu d'bieau discours
Pas eu d'ministre brayant su'l'catastrophe du jour
Eune fos qu'i n'a qu'un tué, un mineur mort tout seu'
Ch'est pas une catastrophe, ch'est tout juste malheureux
Non, y'a eu juste qu'eune veuf' et pis deux orphelins
Et l'chercueil in bos blanc avec min père eud'dins
Et ch'est chu'l'carreau d'fosse, in sortant d'l'infirm'rie
Qu'un homme ch'est invinché, et v'nu au devant d'mi
I'n'savot pas commint faire, alors il a inl'vé s'casquette
Et il m'a dit: "Tiens min loute, garde le, ch'étot s'taillette"
Ch'est un p'tit bout d'ferale, rond, perché au milieu
Pas l'médale du traval, mais pour mi ch'est précieux
ce qu'est l'taillette
