ché avions , les fusées...

nan, ej n'ai jamais piloté ché engins la. déjà i faudro m' payer ker pour monter dins un avion ej l'ai fait un cop à Orly mais chéto à un salon d'anciens avions j'en risquo pas d' décoller. j'ai pas honte de l' dire j'ai peur d'monter dins ché machins la . j'ai eu m' dose quand j'éto marin quand té d' paye mer force 6 au miyeu ed l'océan pacifique avec un batiau qui navigue avec 45 degré ed gite ej te prie d' croire que cha fait drôle et surtout peur, t'arvo d'vie défiler à toute vitesse. ech' jour la si l' batiau i s'ro couqué sur sin flan j'en s'ro pas la aujourd'hui pour raconter mes souv'nirs. ché pour cha qu'asteur ej préfère garder les pieds sur terre.
nan ej voulo vous parler ed ché avions, fusées cocottes, claquoires qu'in fabriquo avec eune feule d' cahier. i fallo un certain savoir faire ché min père qui m'avo appris. in s'amuso bien surtout quand j'éto au lycée Carnot et à Rostand qu'on s'amuso à les faire voler les engins derrière l' dos du prof ou mette l' cocotte sur l' tape ou faire claquer ch' claquoire. té va m' dire t'as pas du in foute lourd nounours au lycée. si la preufe ej faiso des travaux manuel. s'que j'en' comprind pas ché qu'ej récolto des heures de colle à tire larigo, l' salle ed colle à Carnot ale servo aussi d' salle d' permanence et d' projection des fos intre 2 cours ou quand i avo un prof absent in allo passer eune heure ou deux in intindant et d"réviser" nos leçons si j'ai mis des guillemets vous allez comprinte pourquoi.
nous in avo treuvé un jeu. i avo eune équipe qui s' métto un haut dusse qui avo les projecteurs et eune aute in bas et chéto eu batale ed crampons. pour celles et ceux qui n' savent pas s' que ché, chéto un morciau d' papier qu'in plio un plusieurs fos j'usqu'a que cha devienne un bec et suffiso ed mette un élastique intre l' pouche et l'index in somme comme eune fronde et i suffiso d'atteinte l'adversaire. qu'esse qu'in s'amuso bien, ben sur in préno nos précautions i avo toudis un élèfe qui monto la garte à l'intrée d'el salle au cas ou. i avo aussi ché boulettes i fallo mâcher un tiot bout d' papier jusqu'à in faire eune boulette et d' l'intiquer dins un tube de stylo bic souffler d' dins et au hasard atteindre l' tête d'un élèfe ou l'invoyer au plafond al pouvo rester longtemps. et ouais mes genses d' not' temps nos cahiers d'écolier ne n'servotent pas qu'à écrire on pouvo in faire plusieurs usages.