In avint, L'avinture par Lucie Krawczyk

Attintion, ch'est du vécu pou' certain, j'in suis sûre !

IN AVINT, L'AVINTURE

V'là-ti pas, mes ami(e)s, qué j' dôs printe l' vôture,
Pou' aller faire des courses, ch' n'est pas eunne sinécure !
D'abord, j'argarde si j'a bin mi m' ceinture,
Et pis jé m' dis : "Allez, Lulu, in avint, l'avinture !"
Mé v'là su' l' route, et j' sus d'jà bin énervée,
A cosse d' chés z'automobiliss's qui n' sav'ttent pas rouler !
A chaque coin d' chés rues, y' a tout plein d' ronds-points,
Et d'jà, su' ch' volant, mi, j'y donne des cops d' poings,
Tout chà à cosse d' chés panneaux qui sont mal dirigés,
Et mi, tout in rond, j' comminche à tourner !
Jé m' sus trompée d' quémin, j' débarque su' ch' l'autoroute,
Alors là, mes aïeux, chà d'vient eunne vraie binqu'route !
D'vint mi, eunne file d'autos, y' a un sacré bouchon,
Et dins m' vôture, mi, j' sus au bord d' l'esplosion !
Quind j'avinche infin, devint, chà ralintit,
Non mais, dis-donc, ch'ti-là, pou' qui y s' prind ichi ?
Jé m' sus fait doubler par un très gros camion,
Qui, pass' qu'y' étôt pressé, m'a fait eunne queue d' pichon !
Alors, j'ouf' min carreau, j' comminche à l'ingueuler,
Mais y' est déjà trop tard, l' mal y' est déjà fait !
Infin, j'arrif' quind même à m' sortir dé ch' trafic,
Jé m' sus faufilée, pou' mi, ch'est ma-gni-fi-que ! ! !
Mé v'là tout seu' su' l' route, chà in dévient comique,
Sûr'mint qué ch'ti d'in-haut, y m' jûe des tours magiques !
Mais j' vas bientôt arriver à m' future destination,
Ch'est eunne belle et grinte ville, eunne agglomération !
J' crôïot rouler trinquil', j' pinse qué jé m' sus trompée,
Car v'là-ti pas qu'ichi, aussi, chés rues, elles sont bouchées !
Pou' mi pouvoir passer, j'arrête pas d' klaxonner,
Car chés foutus piétons, y pass'ttent sins argarder !
Et rin qu' pou' m'imbêter, y' a qu' des feux rouches,
Et quind y pass'ttent au vert, y n' n'a pas un qui bouge !
Dé toudis m'arrêter, j' comminche à n' n'avour marre,
Commint veux-tu qu'après, jé n' sôs pas in retard ?
Ichi, j' té jure, ch'est pire, y faut faire du slalom,
Mais mi, bon sing d' bonsoir, jé n' sus pas un surhomme !
Et ti-là, gros pépère, dins t' grosse nouvelle vôture,
té veux bin avincher, sinon, j' te défigure !
Chà y' est, chà bouge infin, l' route est bin dégagée,
J' vas quind même pouvoir aller me stationner !
Mais d'un cop, jé m' rinds compte qué j' sais pus dû qué j' suis,
Sûr'mint, j' sus égarée, in tous cas, ch'est m' n' avis !
Alors, jé m' dis : "Lulu, y faut que té t' débrou'lles,
D' toute façon, 'jourd'hui, ch'est eunne journée d'imbrou'lles !"
J'a donc fait démi-tour, in plein mitan d'un camp,
et j' sûs r'partie chez mi en m' disant : "In avant !"
rév'nue à m' mason, au garache, l' vôture,
J' l'a tell'mint bin ringée qué j'a défoncé ch' mur !
Du cop, y' a pus d'auto, mais y m' ress' min vélo,
Et dé ch' fait'-là, té vôs, j' vas faire du pédalo !
Avint d' terminer mes élucubrations,
J'a eunne nouvelle idée, eunne nouvelle solution !
J' crôs qué j' vas m'acater eunne belle et grosse moto,
Comme chà, j' vas zigzaguer comme touts chés zigotos !
Et du cop, j' s'rais l' prémière arrivé au boulot,
In ayant dépaché tous chés tarés d' gogos !

j'comminche à ecrire tin nom sans raviser , cha dit , j'peux qu'approuver , ch't'histoire d'auto , ya même des maisons du qu'ya plus ed' voitures ecqu'd'habitants , j'in ai el preuf in face d'em maison , 5 carettes , dont in camionnette , pour 4 personnes , dont in qui conduit pas cor

cha ché eine aventure qui n'arrive qu'à tous ché énergumènes qui quand y sont din leux voitures y sont les maitres du monde, y n'ont aucune patienche, et y prennent tout le monde pour des chauffards, y a qu'eux qui savent conduire. Et y in a grammin comme cha, in est pu au temps des carettes à qu'vaux, faut s'adapter.