Min gardin par Lucie Krawczyk

Ch'est vrai, ch' printemps y' est là, mais y fait incor' un peu frod, quind même (surtout l' matin et l' soir, in supporte bin un t'chiot lainache).
Dins chés gardins, ch'est la folie : fleurs, arbustes, zoziaux, mauvaisses z'herbes,... s'in don'ttent à coeur jôe pou' poucher à qui miûx-miûx !
Jardinière d' min état, j' vous off' eunne poésie su' min gardin !

MIN GARDIN

Dins min gardin, hé, tiens-té bin,
Y' a des plintes qui m' veul'ttent du bin !
Tous les ins, ch'est l' même ringaine,
J' fais des trôs toutes les s'maines !
Ej' plinte, ej' bêche, et j'intretiens,
Toutes chés belles fleurs d' min gardin !
Ch'est eunne passion, ch'est eunne folie,
Aussi vraie qu' mi, j' m'appelle Lucie !
Grâche à des lif's, j'a vite et bin appris,
Et frinch'mint, bin,... j' sus fière d' mi !
Bon, min terrain y' est pas fort grind,
Pou' l' cultiver, pas b'soin d'un plin !
J'a des rosiers, des plintes vivaches,
Des arbuss's,... et y' a incor' dé l' plache !
Eunne amie m'a promis tout un camion,
Des fleurs d' sin coin, des plintes dé s' mason !
J' cultife plutôt des fleurs, ch'est romintique,
Car à ch' potager, mi, j' sus un peu allergique !
Mais quind j' vôs dins chés magasins,
Chés fruits et légumes au prix où on les vind,
Ch'est décidé, ouais, l'année prochaine,
J' vas in s'mer eunne quintité d' graines !
Chà m'arviendra beaucop moins quèr,
Et chà f'ra vraimint m' n' affaire !
Chés sous qué jé n' dépins'rais pas,
A acater des trucs qué jé n' ming'rais pas,
J' pourrais les utiliser, ch'est certain,
Pou' acater des fleurs qui m' f'ront du bin !
Min gardin, y n' rivaliss' pas, oh qué non,
Avec cheux qu'in vôt à l' télévision !
Avec mes fleurs, mi, chà m' suffit,
J' sus continte quind chà fleurit !
Y m' suffit ed' bin printe soin d'elles,
Et in r'tour, j'a du bonheur à l' pelle !
L' pus belle récompinche, dû à mes soins,
Ch'est d' m'énivrer ed' leu's parfums !
Quind l'hiver y' est là, qué l' saison est finie,
Tout y' est fané, ch' gardin y' est indormi !
Mais dins pas longtimps, dins que'ques temps,
Chà va êt' l' rétour dé ch' printemps,
Alors, j' pourrais arcommincher,
A faire des trôs et à r'plinter,
Incor' tout plein ed' belles fleurs,
Rin qu' pou' avoir un t'chiot peu d' bonheur !

cor bravo lucie , ché formidape , et véridique , faut continuer comme cha , ché un bon passe temps , cor merci , pour les deux