Eunne bonne bouffe par Lucie Krawczyk

EUNNE BONNE BOUFFE

Au pays d' chés mineurs, y' a pas qu' des malheurs,
Y' a aussi dins nos coeurs vraimint gramint d' bonheur !
Dins ch' Nord Pas-d'-Calais, in a des spécialités,
Qui donn'ttent rud'mint invie d' minger !
Dé l' volaille d' Licques, des frites, du pichon fumé,
Des spéculoos, dé l' Lucullus, des bêtiss's d' Cambrai !
J'allôs aussi oublier que'ques fromaches bin typés,
Viûx Lille, Maroilles, Mont des Cats, bin affinés !
Pou' vos papil's, eunne bonne t'chiote goutte d' jus,
Qui s'a bin récauffé au coin dé ch' gros fû,
Avec ed' d'dins eunne ziquette d' genièf' ou d' rhum,
Chés trucs-là, chà s'adresse plutôt à chés z'hommes !
Infin, eunne t'chiote gauf' avec dé l' cassonnat',
Dins vot' bouque, chà sonne comme eunne sonate !
Pis, grâche à tous chés fameux z'immigrés,
Qui sont vénus chez nous pou' travaller,
In peut dire qu'y z'ont bin inrichis nos gamelles !
Dé l' païella, des macaronis et dé l' pizza à l' pelle,
Des kluski, du couscous à tout-va,
Té veux minger, vraimint ? In veux-tu, in voilà !
Tous chés plats-là, y tienn'ttent bin au corps,
Ch'est tell'mint bon qué t'in r'démintes incor' !
Pou' c' qu'y' est dé ch' minger Espagnol ou Latin,
Si té n' n'as pus, n' brais pas,... in n'in r'f'ra d'main !
Pou' l' minger d' chés fameux Polonais,
Rin qu'eunne bouchée et t'es d'jà rassasié !
Chés Musulmins, eusses, z'ont un grind secret,
Ch'est l' lundi qu'y s' mettent à cuisiner,
Du couscous au mouton, et pindint tout' l' sémaine,
Té vas minger l' même : arrête, em' bédaine est pleine ! ! !
Ah, tout chà, ch'est vraimint biau, ch'est vraimint bon,
Mais mi, jé n' rinte pus dins mes pintalons !
Et quind l'idée m' vient d' mett' un t'chiot jupon,
J'intinds m' soeur qui dit : "Lulu, t'est ronte comme un ballon !"
Du cop, jé m' démintes si ch'est mi qui grossit,
Ou si ch'est mes loques qui z'ont toutes rétréchies !
Allez, j' vous laiche ichi, j'arrête ed' discourir,
Jé l' sais bin, mes gins, vous allez in rire,
Min vint' y' appelle,... y m' crie : "Famine !"
J' vous quitte vite, faut qué j' vas à cuisine !
Commint voulez-vous avec tout chà à minger,
Ch' n'est ti pas possip', jé n' peux pas résister !
Jé m' dis qu'après tout, après nous, ch'est les mouques,
Et tout c' qu'elles n'auront pas, chà s'ra meilleu' dins m' bouque !

bin bonne appetit lucie ,
em 'mère al dijot toudis vaut miux faire invie qu'pitié , alors autant in profiter , mais ché vrai qu,avec tous chés gins venus d'autes pays in a grammint cangé nos habitutes in minche grammint plus varié ,
ya quand des cosses qui nous ressent , ech' rassacache , ech' steack frites , et pi nous bistoule bien qu'achteur in parle plus qu'un né l'bos
toudis aussi bien , un plaijir de' t'lire