Ch' l'épouvintal par Lucie Krawczyk

Y trône là, tout seu', au mitan de ch' gardin,
Parmi chés fleurs et chés légumes semés main !
Ch' t'un bonhomme qui nous parle pas beaucop,
Y discute à s' manière aec d'aut's z'animaux !
Pou' s' naissince, tout' l' famill' a aidé,
Et pou' s' vénue au monte, in s'a bin amusé !
In a d'abotd clôé insimb' deux minches d' bôs,
Chà r'ssimblôt plutôt à eunne drôle d' crôx !
Pis, in l' l'a rimbourré avec toutes sortes d' matières,
Coton, laine, pail', tout chà r'tenu par des fils ed' fer !
Y comminchôt à printe forme, mais ch' n'étôt pas fini,
Fallôt faire chà bin car in li donnôt l' vie !
Chés gosses s'amusôttent à chôsir des vêt'mints,
POu' qué ch' bonhomme y s' présinte bin !
In li infile un viûx pintalon tout rapiéché,
Eunne quémiche à carreau un t'chiot peu déchirée !
Pou' pas qu'y' attrape frôd, in li met un gilet,
Qu'in sait pus quô in faire car chés mailles z'ont filées !
D' viûx chabots tout crottés traîn'ttent à ses grinds pieds,
Pou' pas qu' dins l' gadoue, y n' puisse s'imbourber !
In guiss' d' main, in li a mis d' biaux gints,
Eunne paire qu'in avôt in trop et qu'in n'a pas mis souvint !
Et pou' l' tiête, in a acaté eunne belle citroul',
Eunne grosse, eunne pot'lée pou' faire eunne jolie boule !
In a creusé d'dins des neuls, un pif et eunne bouque,
In li a même fait, à sin minton, eusse fausse barp' à bouc !
Pis, pou' finir l' tout, un capiau à fleurs pou' l' protéger,
Quind l' solel va v'nir in été, su' s' tiête briler !
Vient infin l' momint d'aller l' mette à s' plache,
Ch' t'eunne vraie procession, alors, qui s'ingache !
Ch' père in premier, tout fier d' l'exhiber,
L' mère qui suit et surveil' tout chà d' près,
Et chés marmots qui vienn'ttent tout d' suite après,
A l' queue leu leu, comme dins un défilé !
Chà y' est, y' est plinté, ch' biau épouvintal,
Faut mint'nint l' baptiser, ch'est un faite normal !
Chôsir un prénom, et pourquô pas même un surnom,
Ch' Pouilleux, Père Pétard, Sire l' Trouille, chacun donne sin nom !
Mais quind in l'appelle, bin,... y répond qué dalle,
Car in s' moque d' li et dins sin nouveau coeur, chà fait mal !
Alors, y n' dit rin, mais y n'in pinse pas moin,
Y r'mercie l' nature car ch'est elle qui, d' li prindra soin !
Tout' l' saison, y va rester dins l' même indrôt,
Avec pou' compagnie, eunne binde d' copains d' zoziaux,
Qui, eusses, n'ont pas peur de s' drôle d' bouille,
Car y' est là, comme un abri, quind l' pluie les mouille !
Et quind y s'ra r"misé tout au fond de ch' grenier,
Y va attint' sag'mint s' nouvelle sortie, l' prochain été,
In s' racontitn dins s' tiête tout c' qu'y' a vu dins l'année,
Pindant qu'y' étôt d' service à tout bin surveiller !
Y' a trôné là, pas toudis seu', au mitan de ch' gardin,
Parmi chés fleurs et chés légumes semés main !
Ch' tôt un bonhomme qui nous parlôt pas beaucop,
Y discutôt plutôt avec tout ses copains zoziaux !

En lisant vos textes et vos poèmes,vous me faîtes plonger dans mon enfance, je vous lirais des heures entières, continuez à nous faire réver.
merci de tout coeur.