Corons et cités par Lucie Krawczyk

In dit toudis qu'in vit dins des corons et dins de drôles d' cités alignées comme à l'armée, qu' not' région, avec sin passé, n'arrif' pas à s'in sortir !
Tout chà, ch'est pou' nous dévaloriser aux neuls des z'aut's !
Alors, v'là eunne poésie su' s' sujet pou' démintir tout chés z'on-dit

CORONS ET CITES

Dins chés corons, dins chés cités,
Dé m' région Nord-Pas-d'-Calais,
In n'a pas qu' des noirs terrils,
In a beaucop puss' qué du ciel gris !
In peut dire tout c' qu'in vuet,
Mais chez nous, in peut viv' heureux !
Avint, dins chés corons, in intindôt ch' l'accordéon,
Accompagné parfôs du son d'un bindonéon !
Chà mettôt dé l' jôe dins les quartiers,
Quind ch' l'ouvrier avôt fini s' journée !
Pis, ch'est comme chà qu'in a su préserver,
Intre vôsins, eunne qualité : chelle d' l'amitié !
Dins chés corons, dins chés cités,
Dé m' région Nord-Pas-d'-Calais,
Dins l' timps, l'iau passôt par ch' ballon,
Ch' n'étôt pas commt' d' cauffer chà au carbon !
'Jourd'hui, in rhéabilite chés z'habitations,
In met du confort dins chés masons !
Chés convecteurs s' font d' pus in pus rare,
In nous met l' chauffache cintral, faut voir !
Qué dallache dins chés quartiers, dins nos masons,
Pou' certaines gins, ch' t' eunne vraie révolution !
Dins chés corons, dins chés cités,
Dé m' région Nord-Pas-d'-Calais,
In s'intind bin intre communautés,
Qu'in sôt Frinçais, Italien, Musulmin ou Polonais !
Nos parints sont v'nus ichi pou' travaller,
Et y se sont, final'mint, bin adaptés !
Nous, infants, in juôt insimb' dins chés rues,
D' nos jours, tout chà, ch'est bin disparu !
Dins chés corons, dins chés cités,
Dé m' région Nord-Pas-d'-Calais,
In a dins l' coeur eunne sacrée générosité,
Malgré les difficultés qu'in dôt traverser !
L' région avôt eunne vocation industrielle,
Mais elle est toudis restée aussi belle !
In avôt d' nombreus's mines d' carbon,
Des usines d' textiles et aussi des confections !
In a aussi dév'loppé l' sidérurgie,
Et, dins l' même timps, l' métallurgie !
'Jourd'hui, in a fini par tout r'cycler,
Chés mines et usines sont dév'nues des musées!
Mais in est fierdé tout ch' passé,
Car pou' chà, y' a eu des gins qui se sont esquintés !
In a aussi d' biaux coins touristiques,
Chà nous chinge d' chés r'portaches journalistiques,
Qui n' sav'ttent pas toudis mett' in valeur,
Tout c' qué l' région a d' biau dins l' coeur !
Dins chés corons, dins chés cités,
Dé m' région Nord-Pas-d'-Calais,
In sait aussi bin vous r'cevoir,
Grâche à toute not' tradition d' terroirs !
Fêtes d' toutes sortes, carnavaleux,
In sait s'amuser, êt' simplemint heureux !
In vous f'ra aussi goûter nos spécialités,
Vous aurez gramint d' quô vous rassasier !
Pis, vous verrez not' belle région autremint,
Qué c' qué peuv'ttent in dire chés ignorints !
Aors, quind vous r'partirez d' chez nous,
Dites bin partout autour d' vous,
Qu' dins chés corons et chés cités,
Dé l' région Nord-Pas-d'-Calais,
Vous y r'viendrez sûr'mint incor',
Car ichi, in a tout plein d' trésors !
In a même gardé un t'chiot peu d' secrets,
Quind vous s'rez, d' nouviau, nos z'invités !
Et insimb', in écrira alors l' nouvelle histoire,
D'eunne région qu'y' est bin belle à voir !