L' boite à boutons par Lucie Krawczyk

Dins toutes chés maisonnées, chés femmes avôttent eunne boîte rimplie d' toutes sortes d' boutons qui servôttent parfôs à raccomoder chés loques !
Alors, mi, à ch' souv'nir-là, j'a composé eunne poésie su' ch' sujet !

BOÎTES A SOUV'NIRS, SURPRISS'S A SOURIRE

Ch' t'eunne drôle d'histoire qué j' vas vous raconter,
A s' lecture, des souv'nirs vont v'nir vous hinter !
Ch' t'un héritache qu'in s' trinsmet dins chés famill's,
Et surtout intre grind-mère, fill' et t'chiote fill' !
Ch' t'eunne t'chiote boîte carrés ou bin ronte,
Là-d'dins, les z'habitins r'viv'ttent tout un conte !
Quind in décite d' l'ouvrir, né s'rait-ce qu'un peu,
Y' aura d' z'étoiles qui brill'ront dins chés z'yeux !
D' coloris noirs, gris, parfôs même trinsparints,
Y peuv'ttent êt' aussi bleu, vert,... ou d'un biau blinc !
Côté formes, y' a des fleurs, des sortes d' coeurs, des nacrés,
Des carrés, des ronds, que'ques fôs même des z'allongés !
Les matières dont y sont fait, ch'est du nacre, ou bin du bôs,
Y n' n'a même in plastique qui sont tout aussi biaux !
Certains z'ont incor' fil et tissu autour du corps,
Percés d' deusses ou quat's trôs en guiss' d' décor !
Y peuv'ttent v'nir d'horizons différints et lointains,
In voïache avec eusses in les prénint dins les mains !
Vous n' savez pas d' quô j' sus in train d' vous causer ?
M' n' histoire n' vous dit rin, vous n'avez pas d'viné ?
Faut vraimint tout vous dire, j' comminche à n' n'avoir marre,
J' vas pas faire durer ch' mystère, car vous z'êtes d' z'ignares !
Ch' trésor à surpriss's, ch' t'eunne simp' boîte à boutons,
Quind in juôt aux dames ou au dada, servôttent d' pions !
Mais leu' utilité prémière, ch'est d'avoir été décousu,
Pas pou' ch' raccomodache, ach' t'heure, in n' n'in fait pus !
Ch'est plutôt pou' les garder, au cas z'ou, in souv'nir,
D' toutes chés loques qui'in à porté, ouais, chà vous fait rire !
Tabliers, mintiaux, pyjamas, qu'miches, pintalons,...
Des z'affaires qu'in a sacrifié, in n' n'a fait des chiffons !
Mais sins oublier avint d' récupérer tous chés fameux boutons,
Qui vont arjoind'cheux qui, dins l' boîte, d'jà, y sont,
Et intre eusses, y s' racont'ront quind, dins l' folie d'un soir,
Vous aurez décidé d' les sortir, comme chà, pou' voir,
D' z'imaches d'un passé et d' souv'nirs,
Qui, dins un incien timps, vous ont fait sourire !