la boîte à boutons, Ch Bruchet

De Charles Bruchet Noeux les Mines (1925-1989)

In connot eun’ époque, à ch’t’heure,
Où l’économe est critiqué :
In jette des chos’es, ah ! que malheur,
Sans les avoir bien ravisées.

Mais, ch’est pas tout partout parel,
Et y’a cor, dins grammint d’maisons,
Des femmes, pour mi, des vrais modèles,
Qui, d’ché viell’es loques, gardent chés boutons.

Et ch’est ainsi qu’au fil des ans,
S’intassent dins l’boîte à boutons,
Les souvenirs de tous les instants,
Qu’in ar’tripote à l’occasion.

Et ch’est aussi eun’ bonn’e manière,
D’écrir’e l’histoire de s’péquée,
D’ar’vivr’e des momints gais ou amers,
Que les boutons peuv’ent raconter.

Quand l’boîte su l’tabl’e alle est vidée,
Que d’souv’nirs in si peu d’plach’e,
Chés chi, ch’est de m’n’oncl’e Amédée,
Chés là, ch’est d’min parrain Eustache !

Pou m’ femme,ch’est toudis ses éfants
Qui parl’tent à travers chés boutons ;
Des bleus, des ros’es,des pt’its, des grands,
Des rhabillur’es ed’nos deux garchons.

Surtout n’in riez point, mes gins,
Mi, j’lai déjà vue, toute attendrie,
Serrant un bouton dins ses mains,
Qui v’not d’eun’ brassièr’e d’un pétit.

Quéqu’fos, am’dit : té vos,ch’ti chi,
Cha vient d’un pull-over de ch’grand,
Et l’premièr’e fos qu’il l’a mis,
Y’a queu dins eun’e flaque in courant !

Un’aut’e bouton a eun’e histoire,
Qui fait frémir à raconter,
Un biau pétit, couleur ivoire,
Qu’min pu vieux y s’étot mis dins l’tro d’nez.

In rit à ch’t’heure, car ch’est passé,
Mais à l’époque, que d’tourmints,
Surtout qu’y a des boutons dins l’nez
Que bonne pommad’e ne guérit point !

A l’occasion, quand j’rafistole,
Un sac à mains ou eun’musette,
Dins boite à boutons plein’e ed’bricoles,
Y a toudis un je n’sais quo qui s’y prête.

L’boîte à boutons, chest un trésor,
Qui n’intéress’e pas les voleurs,
Ch’est eun’ espèc’e de coffre fort,
Qui gard’e sans clef tout’ses valeurs.

Quand in cope ch’pain in fait des miettes,
Qui faut offrir à chés moniaux,
Mais les vieux boutons sont des restes,
Qu’in dot garder comme des joyaux