El minger polonais par Lucie Krawczyk

Avis à chés galaff's !
Y' n' n'a qui vont printe des kilos rin qu'à lire min poème !
Alors, d'avinche, bon appétit ou smacznego !

EL MINGER POLONAIS

Pou' nous, chés fameux Polonais,
Ch'est eunne affaire ed' bin faire à minger !
In va commincher par l' meilleu', l' sucré,
Rin qu' d'in parler, chà vous fait saliver !
Du placek, du sernik, dé l' babka, des paczki,
Du makocz, des nalezniki, des faworki ou chruszcziki,...
Et incor' bin d'aut's cosses aussi, jé n' m'in souviens pus,
Pis, j'avôs faim,... du côp,... y n' n'in reste pus !
In va passer, si vous l' voulez, à ch' t'heure,
Et tout chà rin qu' pou' vot' bonheur,
A parler d' chés mets salés d' chés Polonais !
Rin qué d' les cuisiner, ch' quartier y' est imbaumé !
Dé l' czarnina, des kluski, des pierogi, dé l' leberka,
Dé l' swiateczna, dé l' kiszka, des pledze, des sosiski, dé l' smierka,
Dé l' kapusta, des ogorki kiszone, dé l' soupe aux p' tits pois,
Avec ed' dins eunne belle, grosse et grasse metka !
Ah nan, né m' parle pas d' cholestérol,
Car mi, maint'nint, ej' vas t' parler d'alcool !
Dé l' Wodka, dé l' Zybrowka, dé l' Wybyrowa,
Dé l' Przepiowka, dé l' Zywiec, dé l' Cytrynowa,...
T'inquiètes donc pas,... mi, j' n'in bôs pas,
L' seu' risque qu' ti t'as, ch'est d'in êt' gaga !
Ah, quind j' vôs minger certains Frinçais,
Avec eunne dizaine d'huît's, y sont vite rassasiés !
Mi, j' vous l' dis, chés trucs-là, tout gluants,
Qué j' trouf' même assez dégoûtants,
Vraimint ragoûtants et très peu appétissants,
Faut n'in minger des tonnes pou' avoir sin content !
Et chés plats à base d' cuisses ed' gernoulles,
Non mais, ch' cuistot, faut pas m' printe pou' eunne indoulle !
Si jé n' ming'rôs qu' chà, mi, j'aurôs incor' faim,
Car des grosses quintités, y m'in faut gramint !
Les chefs, eusses, m' diront : "Les Français sont fins gourmets,
Tous ces plats délicats, ils savent les savourer !"
D' min côté, j' sais qu'avec el' minger Polonais,
Ch'est sûr qué jé n' risque pas d'êt' affamée !
In puss' d' chà, chà donne un t'chiot peu d' traval,
A chés boïaux et à ch' trinsit intestinal !
Et quind in a bin mingé, et surtout bin digéré,
Avec facilité, à chés cabinets, in va tout bin évacuer !
Alors, avint d' vous moquer et d' critiquer,
Tous chés gros, obèss's et cheux bin inrobés,
Assurez-vous d'abord qu' ch' n'est pas qu' des Polonais,
Mais d'mindez-leu' seul'mint si y z'ont bin mingé !