Ech' convecteur par Lucie Krawczyk

Eh ouais, ch' t'incor' mi !
Vous aimez lire et vous souvenir !
Alors, bonne lecture !

ECH' CONVECTEUR

D'pis fin octob', enfin, in l' l'a rallumé,
Car y faichôt frôd dins l' maisonnée !
Tous chés matins, ch'est l' même refrain,
Y faut l' nétchier pou' qu'y cauffe bin !
Un jour su' deusse, in vide ch' bac à chind's,
Là, mes aïeux, j' va rin vous apprinte !
Après qu'y' est bin armonté, y faut pas oublier,
D' l'archarger, d'y donner du carbon à minger !
D'pis que'ques z'années, in vôt dins les corons,
D' moins in moins ed' convecteurs à carbon !
In équipe chés masons avec l' chauffache cintral,
Faut viv' avec sin teemps, ch'est tout à fait normal !
In pluss', l' traval, y' est d'eunne facilité,
Té tournes ch' bouton, chà y' est, chà va cauffer !
Certains diss'ttent que ch' n'est pas l' même caleur,
Tous chés tuyaux, hé,... chà leu' fait même peur !
Des z'aut's diss'ttent : "Ch'est vraimint génial,
Ch' progrès, nan, ch' n'est pas un mal !"
Mi, à m' mason, j'a pas d'aut' solution,
Pou' l'instant qué ch' convecteur à carbon,
Car chez nous, ch' fameux et grind progrès,
Ch'est pas avint incor' que'ques z'années !
Dins m' cité, les viûx vous diront,
Qu'avec ech' convecteur à carbon,
L' caleur est binvénue dins les masons,
Dé ch' faite-là, in n' sé fait pas d'illusions !
Mais chà y' est, ch' t' année, tout y' est chimboulé,
In va nous installer, enfin, ch' fameux progrès !
Qu'est-ch' que chà va êt' comme chintier,
Y vont tout nous casser dins nos masons et cités !
Mais à bin réfléchir, mi, j' déminde pas miûx,
Qu'y mette el' chauffache à l' plache d' min fû,
Chà f'ra moins d' poussière dins m' mason,
Qu'avec ech' foutu convecteur à carbon !
Ch'est sûr, chés travaux vont m' causer d' gros soucis,
Mais après, j' f'rais p' t' êt' un t'chiot peu d'économies !
Alors, n' vous inquiétez donc point, j' vous tiens au courant,
D' l'évolution de c' qui s' pass'ra dins les prochains z'ans !