Tempête sous un crane

TEMPETE SOUS UN CRANE de Jean Dufossez

Comm' Victor Hugo , j'viens chi vous parler d'ein' tempête,
d'cheul qui s'pass' in d'sous min crâne .
J'ai fait un examen d'conscience ......Dins m'tiêt' ch'n'est point l'fiêt' ,
j'vas vous in parler , avint qu'ej' croul'in d'sous vos vann's .


L'aut' jour ,j'tos plongé dins mes pinsées ,
em' feimm' am' dit :Bin... à quo qu'té busies ?
Et bin ,croyez me, cha m'a réveillé ,
rindez vous compt' ,j'étos in train d'busier à rin..Si si !


Ia des momints, j'décroch' ....Bin ouais ,j'décroch'.
Bin sur ,j'n'ai pus vingt ans comm' in dit :.....J'ai vécu ,
I m'arrif' bin souvint à l'occasion ,d'kéir d'us un och .
Par exemp' ,à du qu'j'ai mis mes affair's ,j'né l'sais pus .


Em' mémoir' ed pus in pus al' flanch',
comm' in dit, dins l'canchon : Je m'souviens plus très bin .
Pou m'souv'nir du prénom d'Alzeimer , i m'faut mett' des manch's ,
d'sus l'théorèm' ed Pythagor' ,j'mé cass'ros les reins .


Et quind j'bricol'!!!!!là aussi jé m'fais d'el bile ,
bin souvint, em' n'otchiot i keu d'mes mains .
Ch'est fou ,j'qué j'peux êt' aucor' ein' fos malhabil',
si j'travaillos cor ....J's'ros sins arrêt dins l'pétrin .


In m'a dit :..... Un jour té n'pourras pus picher tout seu ...P'têt' .
Avint cha m'arrivos , seul'mint quind j'tos pompett',
comm' un andoull'.....d'fair' pipi à coté d'el cuvett' .
Ach't'heur ,cha m'arriv'... Quind j'oublie d'mett' mes leunett's .


Mais heureus'mint ,j'ai cor bon appétit ,
jé m'régal' aucor bin ....avec tout j'fais bonn' chair .
I vaut miux m'avoir in cart' postal' qu'in pension ,j'vous l'dis ,
quind j'ai les pieds in d'sous l'tap' ...pou m'fair' bouger ch'est la guerre .


Et pis ,à par mes tchiot's douleurs, i n'a rin qui m'chagrin' ,
j'ai m'rat' qui m'épat',un estomac d'jon' fill' ,
m' n'intestin et min colon qui traval't'nt pou la marin'
et min foie , ia longtimps ,qui n'sé fait pas d'bil' .


Et si dins quet' fos ....m'verg' al baiss' pavillon ,
i a toudis in n'sait quo qui a l'dragée haut' ,
ch'est m'verv' ,avec ell' j'sus cor capap' d'vous monter l'bourrichon .
Pou rabatt' es orell's aux gins ,j'ai toudis la cot' .


Cha s'rot pir' pour vous ...d'm'avoir dins les fournaux avec bobonn' ,
à potasser les r'cet's ed cuisin' et les bons plats ,
qu'à m'avoir au lit avec el patronn'
à discuter d'sus les positions du kamasoutra .


Bin sur ,vous allez m'dir : Ya pas qu'ti ,
si cha peut t'consoler ,t'n'es pas tout seu .
Et pis, i faut t'nir compt' et tout dins la vie ,
in n'jug' pas d'l'état d'ein' votur' à l'usur' ed ses pneus .


Ia qu'et'fos des circonstances atténuant's ,
tint va l'cruch' à l'iau ,qu'un jour al sé cass'.
Y arrif' un jour ,in n'a pus l'form' olympiqu',dont in s'vant',
à ch'momint là ,i faut décrocher , fair' la pass' .


Alors, i m'arrif' ed busier à tous les bougeons d'equell' qu'j'ai gravis ,
aux années passées à l'cour,à r'chevoir d'el pleuf' sus l'dos .
Aux hivers passés dehors , sans arrêter pou intempérie ,
à grinds renfort d'synapismes à l'moutard' et cuillers ed chirop .


A l'poussièr' qu'j'ai avalé dins les usin's , les ateliers ,
tout l'bruit qu'j'ai intindu, qui,m'foros ach't'heur un cornet acoustiqu',
et tind' l'orell' au moindr mot ,et fair' répéter .
A caus' ed cha , les jaun's ,i m'font la niqu' .


Aucor aut'cos', dont j'devos vous parler, si...I faut !
J' sus d'pus in pus ....C'mint dir' ...:Soup' au lait .
Pou un rien j'mont' sus mes grinds qu'vaux ,
comm' in dit dins ch'Nord ...: J'mont' à mollett' .


Dins l'temps ,j'étos pus serein ,comm' in dit ach't'heur , pus cool ,
i fallot vraimint m'titiller pou qué j'rue dins les brancards .
Ach't'heur , pou rin ,j'pêt' les plombs ,comm' ein' andoull' ,
ch'est ti l'artour d'ach qui veut cha ? Quet' fos jé n'd'ai marr' .


Enfin mes amis n'croyez pas qué j'vous fais la gueul',
pou qué j'disjonct', i faudrot vraimint m'pousser à bout .
Jé n'peux pus batiller ... Mes ergots sont passés à l'meul' ,
Dieu soit loué ,j'ai cor d'l'humour ,j'sus cor un grind fou .


Vous peuvez m'critiquer, m'jeter des pierr's ,
j'm'in fou , j'ai pris min pied, ch'est important d'dir' ch'qu'in busie .
Mais , tint qué j'sus cor là ,j'vous prie d'vous tair' ,
au bin jé n'vous compte pus au nomb' ed mes amis .

Jean Dufossez

bin ya pas grand cosse a rajouter , ché bin dit , ché bin la vérité , j'cros qu'in est tartous au même point , arrivé à un certain ache , comme ech' dis toudis , j'su pas pessimiste , j'su pas optimiste , j'su seulemint réaliste
BRAVO JEAN

En réponse à maurice
Je te remercie de l'intérêt que tu as porté à la lecture de Tempête sous un crane, c'est important de se sentir épaulé
C'est vrai qu'un jour ou l'autre on se trouve confrontés à certains problèmes, heureusement que l'on a son conjoint pour se stimuler !!

bin ouais j'em su rindu compte que ché c'qui passe din l'mien , et ché vrai qu'cha fait du bien d'in discuter , et d'savoir qu'in est tartous parel , à travailler avec chés boyaux d'nous tiête , chetot in bonne réflexion