cahiers de composition

chéto jamais eune bonne surprisse quand qu in les voyo impilés au coin du bureau dech'maite
ah ché vrai, déjà, cha fait un mo ! in les arconnaisso facil'mint i zavottent un proteche cahier plastique couleur marron , ché cahiers d' composition ....

ah i zétotent pas mates au bout d' l année cheulale, ch' maite i les sorto eune fo par mo pour qu in fasse ed sus ché excercices qui allotent compter pour l' class'mint mensuel del classe
ah zavez connu cha mes gins, l' class'mint mensuel, que quand in perdo eune paire ed plaches in avo toudis eune bonne escuse, ouais, untel i est l' chouchou d'ech' maite ché pour cha qui est passé d' vant mi au clas'mint, j a pas pu bin faire min devoir pasque untel i m imbeto, et patati et patala quo ché qu in a pu tous inventer comme histoires pour pas dire qu in avo baillé aux cornales eune partie du mo , ou in francais qu in avo été "dissipé" et cor dissipé in éto pret à arprinte l' rangaine, ché l' faute à untel, etc in nin finiro pas

i zétotent pas mates ché cahiers là, pasque tout l' monte i in preno grand soin, d' abord ch' maite, i les ringeo tout l' restant du mo dans eune armoire vitrée que ch' t infermement presque perpétuel i avo donné eune odeur espéciale à ché cahiers là, au solel et sans et' granmint manipulés
d' ailleurs chéto bin l' seul protèche cahier qui éto cor intaque à la fin d' l année, à l intérieur t avo pas eune pache d écornée , c' qui pouvo et c' qui arrivo à nos cahiers d' tous les jours : cahier d' leçons, mais surtout cahier d exercices, sans parler alors du cahier d' brouillon où là j' me souviens que ch' maite i m avo dit qui avo eune différence entre cahier d' brouillon et torchon, faut dire qu in ravisant à postériori un cahier d' exercices, j a eu les poils qui s' sont soul'vés et peutete si zetes saches j' vous mont'rai cha , preuffe que ché zinstituteux i zont raison ed pas desespérer d' not' av'nir , in regue générale, meme si in est loin d ete des génies, in prend quand meme bin soin d' nos affaires , j arviens à min sujet , j éto cor parti divaguer

ch' l instituteu i faijo attention à ché cahiers d' composition , souv'nez vous i zavotent un buvard espécial, qui resto à l année, mes gins, à l année dinch' cahier espécial

cahier espécial aussi pasque i pouvo toujours i avoir l' déchinte et j' me souviens qu in l a eu un coup , ché la presence durant eune journée voire plus d un inspecteur

ch' maite i nous prév'no à l avinche que l' lend'main i avo la présence d un inspecteur , qui fallo pas s affoler, qui éto là pour simplement raviser l' classe, i nous dijo pas qui éto la espécial'mint pour raviser SIN traval

faut dire que nous in éto tchiots mais quand meme pas neuneux qu in armarquo bin que ch' jour là ch' maite i éto tout gintil avec nous, i sourio toudis , i gueulo jamais, i éto toudis contint ...... ah ché pas ch' jour là qui auro lanché eune craie à travers l' classe sur un eleffe distrait, ché pas ch' jur là qui auro fait l' tour del classe pi qui auro foutu eune baffe à ch' l éléffe qui se s'ro indormi durant l' classe

ch' l' inspecteur général, j' me souviens i avo eune calvitie bien qui devo cor et' jone, j' dis jone achteure, j' su sur qu à l époque , qu avec s' calvitie, ses moustaches et ché caveux roux, j i auro donné dans les 40 50 ans , ache qui à l époque éto synonyme pour mi d' ache avinché
al' vele de la cinquantaine, j' sais pas commint et pourquoi mais j a cangé d avis , in pourro dire que plus in vieilli plus in devient comme l' glaine, in fait lo sophe
l' cahier d' composition chéto aussi pour nous important qui so bin t'nu , comme i dijo ch' maite, ché "l'reflet d'vot' traval d' l année" "appliquez vous, i do nin y avoir d' paches écornées, d' patés d' enque, ni d'ratures" (j' vous l' mets in patois mais il dijo en francais)