cang'mint d' regard

y a quéquosse qui a évolué in bien durant ché dernieres décennies, ché l' regard su ché zandicapés
j' cro surtout que ché grace à l information , au fait qu in n in parle, que y a des témoiniaches et qu' achteure in sort plus les zinfants qui sont comme cha qu avant

avant chéto cor rare d in vire, j' me souviens du fils du magasin d' artiques ménagers, j' cro que chéto plouviez, sul' rue nationale, j 'sais pu si ducrocq ch' l ancien boucher , ouais i fait surtout du traiteur achteure, i s'ro pas dins ché anciens locaux d' chez plouviez ou alors ch' magasin d' artiques ménagers i éto plus à gauche et i auro été abattu in meme timps que ché masons qui cachottent l impasse toupie

cha lou marcel i pourro nous zéclairer

ch' jone , quand que j' dis ch' jone, i devo avoir 16 18 ou 20 ans , i faijo des grimaces derriere l' vitrine, i a meme des coups qui l' léquo , mi tchiot quand que j ' devo aller acater un pain, j' passo d' vant à toute vitesse , i m impressionno

l' indro qu in n in voyo beaucoup chéto à berck , j' me souviens qu' mes parints i zin parlotent sous eune forme ed compassion, mais in oso pas trop les approcher, as' deminder si chéto pas contagieux

i n a qui étotent dins d' zespeches ed carettes à moules , poussées par des arligieusses, certains portotent un casque ed cycliste sul' tiete, d' autes avottent un appareillache in fer tout l' long del gampe et eune drole d' godasse au bout du pied, quand que j' dis drole, cha s' ro plutot bizarre , ché comme in dit un pied bot mi tchiot commint qu on pouvo ap'ler cha pied bio, alors qui éto tout moche ?

l' plus impressionnant chéto cor ché mongoliens, in n in voyo quéqu' fos dins l' rue

pi in éto sensibilisé al' maladie , par l' vente des timpes, so pour l' polio, so pour l' tuberculosse, et in éto persuadé , mi in premier que toutes ché maladies là cha pouvo s attraper rin qu in s approchant d' trop près

j' espère sincer'mint que j a choqué personne , ché eune vision d infant, rempli ed mystères et d' non parlache, achteure in est plus habitué, in conno plus ché maladies là grace à d' zarportaches, l' fait d' plus les connaite in peut plus in parler à nos zinfants