4 ans : min premier gardin...

J'avos à peine 4 ans (1974), equ'min grind-père i m'expliquot d'jà tout c'qui bricolot. Cha s'passot dins'n'atelier quand y avot del pleufe. Et l'resse du timps, chétot dins sin gardin qu'i allot querre du bon timps. Mi et min frère (in habitot alors à Grenay, au-d'ssus de l'Caisse d'Epargne) in allot passer tous les mercredis après-midi chez mes grinds-parents. Ch'étot au 5 rue Nungesser, à l'Cité 40.

Et pi v'là l'jour qu'min grind-père, i nous prind par el' main pou nous dire: "V'nez mes tchiots, j'vous a fait un p'tit plaiji". In l'suit, pensez donc, chétot plus qu'eine intrique, ch't'affaire là...
Et pi, là, dehors, à côté d'sin parterre ed'fleurs, y avot un truc formidape : deux p'tits gardins d'à peine deux mètres carré chacun, délimités par des vieiles plankes ed'bos. Et pi i nous dit : "Voilà, mes tchios, ch'est t'a vous autes deux ! I va falloir in printe soin, tout comme mi".
J'étos plus qu'heureux, ej'm'in souvins très bien. A partir de ch'momint là, dès que l'belle saison elle étot arvénue, min frère et mi chétot direction ech'gardin. Y avot pas b'soin ed'nous prier pou cha !

Dins nou gardin miniature, y avot presque tous les mêmes légumes qu'dins l'gardin d'min grind-père : ess-t-à dire : 5 carottes, 3 pieds ed'fraises, 2 salates, un pied ed'patates, trois oignons, ed'l'aromate (j'étos fier comme tout quand em'grind-mère elle m'disot "Tiens, Jacky, va m'querre eine branke ed'thym dins tin gardin)", etc...
In arrosot, in désherbot, in récoltot et pi in ersémot des graines. Cha a duré plusieurs années, jusqu'à c'qu'ein s'désintéresse ed' tout cha. Mais, enfin, quelle expérience ed'vie min premier gardin.
A ch't'époque là, presque tous chés pères i faisotent lu gardin. Et bin, i faut savoir qu'y avot aussi, quéque part dins ch'coron un gosse que cha a tellemint marqué, qu'asteure, dès que j'sus dins min gardin, i n's'passe pas eine fos où l'imache ed'min grind-père elle m'arvient. Et quand l'récolte elle est bonne, i m'arrife même ed'raviser très haut din ch'ciel et d'y dire tout simplement "Merci Pépère".

Voilà, c'hest fini. Ah non, j'allos oublier : dins deux mos, ch'est l'anniversaire ed' min fils : y aura 4 ans.....

Ch'l'artique y m'rappelle aussi eude sacrès souv'nirs.
Min père y'avot fait parel avec mi. Y m'avo même aquaté un loucher pis un ratiot à m'talle, et min grand père maternel ancien cheminot qui vivo à Frechcviller, din l'Somme, à côté de Doullens, y m'appreno j'gardin quand j'y allo en vacances. In allo aussi à ch'l'herpe aux lapins sur l'bord et ché qu'mins avec un' quarette à bras.
J'l'artique y m'a ému, Surtout l'fin. Ech regard in l'air et ch'merci Pépère.
Des frissons sur m'giffe et des tchotes goutent à mes zeuls,
Et ché vrai qu'ché grâce à eux que beaucoup d'fils ed mineurs avotent gardé j'goût et ch'savoir faire du gardin.
Cha s'oublie pas cha !