Les jardinsed'puis min nouvio pays
par wallart le, 04/04/2008Cha fait d'jà 10 ans qu'j'a quitté min Nord Pas-de-Calais. Asteure ej'vis dins min nouvio pays : el'Charente. Mais is'passe pas un jour où des imaches i m'arviennent à m'mémoire. J'a souvint des flashs en plein journée.
J'a vécu ent' Bully-les-Mines et Grenay dins ché zannées 70. Ch'étot chez m'grind-mère et min grind-père al'cité 40 ed' Grenay.
In jouot avec chés voisins à "ch'tas d'schiste". In montot tout in haut par es'face el'plus abrupte, ch'étot note montagne à nous zotes. In étot tout eine bante ed camarates, el'plupart fisses ed'mineurs. Y avot aussi des files avec nous. Arrivés ein haut de ch'terril, in s'amusot à jéchter des gros pneus usés, des restes ed' reules ed'bahuts qui vénot là pou travailler à monter toudis plus haut min Tas d'schiste.
Chés pneus y dévalottent à eine vitesse, fallot vire cha. Mais parfos, ein n'avot quéques problèmes : Cha arbondissot tellemint qu'cha réussissot à sauter par ed'ssus ches clôtures des masons tout in bas de ch'terril. Et là cha finissot es'course dins chés gardins. In s'sauvot par l'aute face : ché gins y sortottent ed'leur masure en gueulant tell'mint fort, eq' parfos chés pères y comminçotent l'escalate de ch'Tas schiste. In rigolo bin.
Aujourd'hui, pour em'souvenance, dès que le spleen i est là, j'acoute Edmond Tanière et à travers ses deux canchons "Ech'terril d'Rimbert" et "Tout in haut de ch'terril", j'voyache dins l'temps, gratuitemint. Et parfos, pou pas dire presqu'à chaque fos, j'verse eine tchiote larme.
