L'deurnier Poilu

L’deurnier Poilu

Lazare, t’es l’deurnier poilu dé ch’terripe carnache ,
Ti , té volos pon faire tant d’armue ménache,
pou t’donner à tin départ tout ch’trala
aveuc Présidint, députés, Mayeur, écétéra !

Et din tin biau cerceul, bin achochoné,
quaind dins l’cim’tière , el clairon i’a sonné,
edvant le rassanage ed chés biaus biecs bos
p’têt’ t’as busié : « Ch’est l’clairon , in s’arva à l’assaut ! »

Adès, t’as arsinti dins t’bouque sins dints ,
el goutance dé l’berdoulle, dé l’drache, du vint ,
des poux ,dé l’bleusse frousse, dé l’pisse, du bren,
des clopes, du frod, dé l’suée, du chagrin,
d’z’obus copant les corps din l’horripe boucan,
dé l’puève ed sang, les cris d’agonisants ,
dé l’folie, d'z'estropiés qui brayotte,
du sintimint des pieds et des crottes ,
el moncheau d’morts pourris, des z’ordures,
d’l’iau qui guille, dé l’crasse pouriture,
el musique des balles, el gasse indormi
des rats affamés, des loques rassarcies ,
des sorlers troés, el noir des yux brulés ,
l’terripe haine cont les planqués !

Pasqu’à Paris in dallot toudis au théâte!
In festoyot à s’in mette plein el rate !
In continuot à vive dins l’confort,
In obliant l’guerre, les poilus et leus morts !

A vingt ans ,ti et tes brafes comarates,
cinsiers, overriers ,bureaucrates,
in a fait d’vous ed fort trisses spadassins
pou donner à la France un biau destin !
Et padvant, ch’tot parel , menmes paroles,
pou donner à l’All’mane , un biau rôle !

Mênme qu’un aviateu , i’a ravisé d’la haut,
d’chaque côté du front, eine messe in disot !
D’chaque côté ,el menme Bon Diu in priot ,
pou donner el victoire au pus dévot !
Et pou l’plaisi d’généraus bin à l’coïette ,
in dallot s’finte el vinte à l’bayonnette !

Et pou gangner el toupette d’eine colline,
el tierre alle prénot l’coleur dé l’sanguine !
60000 Morts in eine seule jornée ,
pour argangner el Mort-Homme bin nommé !
Tous ches généraux, Nivelle et Mangin,
vous avez brissaudé el vie ed vos gins !

Trisse année mille neuf chint dix sept !
Les sodars , l’moral dins les cauchettes,
arcrans ,volotte pus faire la guerre,
pou fraterniser aveuc l’adversaire
I z’ont archu eine peine disciplinaire :
in n’d’a fusillé in chint…ecsimplaires !

In d’vrot el onze novimpe ed chaque année,
organiser el grante Fiète ed la Paix !
Qué ch’jour là , in respecte nos taïons,
estoqués pa l’z’industriels du canon !
In freum’ra les grantes seurfaces sins ecsepcion,
pasqué ch’jour là , alles font des promocions !
Qué l’télé moute des documintaires ,
pou dégoutter les jonnes ed l’affreuse guerre !

Ch’est vrai qué ç’tuerie là ch’est telmint lon.
Mais fot s’ramintuver el dicton :
Un pays qui met s’passé dins l’obli,
ch’est d’pays d’vius, sins av’ni