Les cadiaux

I'a l'cadiau obligatoire :
Un jour in a archu un carton disant qu'in étot invité au mariache dé l’file dé l’soeur dé m’feime autermint dit em’ niéce ! In d'vot i'aller, sinon qu'es qu'in arot intindu pa min biau frére ! Alors pou êt' présintape, em’ feime alle a sa arnouv'lé complét'mint : 300 Euros ed nuéfes loques ,60 d'nouviaux sorlers, 40 d'coiffeur . Pusse pou l'voïache aller /artour in carette 150 Euros d'essence,150 d'péache , 60 d'hotel . Total 760 Euros ! In avot pu d'doupes pou l'cadiau ! Alors in a acaté un vase ed 5 euros à l'Farfouille !.. A crédit ! Quaind in est arrivé la-vau, queulle seurprise, in avot mal lu l'carte d'invitation ! In étot invité .....foque au vin d'honneu ! 760 Euros pou minger foque un tiot gatiau arséqué et boire el démotié d'un vierre ed piquette !

I'a l'Cadiau original :
Min névu i sa marié à Nice. Ch'cop chi, in n'sa mie déplaché ! Pou sin cadiau d'mariache, in li a invoyé pa l'Poste eine armoire à fromache ! Et pou li rap'pler l’z’espécialités régionales, in a mis eddins un Maroille et eine boulette d'Avesnes ! Seul'mint voilà la Poste ....alle a fait gréve ....1 mos ! Mamére ! El facteur niçois, aveuc un mouquot à sin nez, i'a am'né l'colis au mitan d'un nuache ed mouques à l'débout d'un bâton !

I'a l'Cadiau seurprise
Ch'tot bétôt l'anniversaire d'min biau frére, j'dmande à m’belle sœur chu qui li f'rot plaisi . Em belle soeur alle a posé l'question à sin mari et alle m'a téléphoné " M'homme i voudrot eine paire ed jumelles ! I'a ker ed raviser les paysaches " Em'n'oeul ! Ch'est putôt pou raviser l'viseine in train dé s'faire bronzer din s'gardin ! Quaind min biau frére i'a archu s'cadiau , i'a décafoté l'imballache aveuc soin, in n'déquirant pon l'papier! Pasqué rapiat comme i'est, i va cor s'in servir ! Qué comédie ! I'a fait l'étonné "Oh des jumelles ! Justémint j'voulos in acater !" Faiseu d'grimace va ! (Hypocrite)

I'a l'Cadiau économique :
Pou min névu, parel j'ai d'mandé à s'feime : " Eine perceusse ,qu'alle répond. Cha fait 3 ans qué ch'fainéant là i dot m'poser des étagéres. I né l'fait point pasqu'i n'a pon d'perceusse ! " Quaind i a vu l'perceusse, min névu i'a torné d'l'eul ! Et comme in est visin aveuc li, el' lind'main m'feime alle a artrouvé l'perceusse din ...l'poubelle! Alle l'a récupéré. L'année d'aprés in a cor offert el perceusse à min neveu ! Rebelote ! Poubelle ! Cha fait 10 ans qu'cha dure ! In fait d'z'économies !

I'a l'cadiau diplomatique : Ch'est l'cadiau qu'on dot toudis moutrer à l'personne qui nous l'a donné ! Tiens em' Mamatante Théresse ,i'a 30 ans, alle nous a donné à not’ mariache un grand vaze. I'est grand grand grand ! Tell'mint grand qu'in peut nettier ses pieds eddins ocor faire eine réserve ed 50 kg d'peunes tierre ! A chaque cop qu'mamatante alle vient nous vir, habile in dot wuidier (vider) l'vase et l'mette au salon ! Et matante, alle arrife, donne eine baisse et sorit bin bénache ed vir sin vaze pad'seur l'tape. Pis mamatante alle n'est pu v'nue pindint 10 ans ! Et un jour, seurprise ,alle a écrit qu'alle vénot !
- Sandrine ! (ch'est m'feime) Mamatante Théresse alle va v'nir ! Duss qu't'as mis sin vaze ?
- Té sais bin qué j'l’ai vindu à l' brocante !
- Ouyouyouille! In va avoér ein incidint diplomatique!
In a fait tous les botiques ed Lille pour treuver el même vase ! Cha a couté foque ....250 Euros ! Quand mamatante alle est rintrée, habile ses yux d'cat i z'ont vu sin vase ! Alle a sorit in nous disant :
" Ch'est pon vrai qu'vou avez cor wardé ch'viés'rie là ! »
Tiot Rital

Quel plaisir de lire ech' tiot Rital, jem'deminte dù qui va quer tout cha, y avot un momint qu'in l'avot pu vu d'ssus l'site, merci à toi et bonne continuation. Adé mes gins.