Les sorlers

Les sorlers

Nous les z'hommes pou acater des sorlers, in va vite : In ravise el vitrine, in rinte din l'magasin, in arsort aveuc el vindeusse pou li moutrer el modéle qu'in a arténu dins l'vitrine Pis in rinte, in essaie les sorlers, in paie et in s'arva! Vous z’êtes d'accord, les hommes ? Ouais ? Tas d’minteux ! Pasqué el vindeusse alle nous fait des yeux tell'mint gadoux tendres) qu'in n'résiste point à li acater 5 paires ed lacets, pusse eine boite ed cirage espécial puéve, pusse eine aut' boite cirache pa temps sec pusse 6 paires ed cauchettes ! Moralité el facture, au départ ed 30 euros, alle passe à 60 euros !

Em feimme quaind alle acate des sorlets, ch'est point parel ! Alle prind bin sin temps ! Alle comminche pa daller din l’pus tiot magasin. Là, alle essaie eine paire ed sorlers pis eine déziéme pis eine trosiéme pis eine aut' pi cor eine aut' ! A l’fin i'a 60 boites décafotées ! Et à l'débout, alle dit à l'malhéreusse vindeusse : " Ej 'vas réfléchir ! Et alle part réfléchir din ein aut' magasin ! Rebelote ! Cor 60 boites décafotées ! Pis, alle part réfléchir dins un trosiéme magasin, pis un quatriéme, un chinquiéme magasin et alle va réfléchir dins tous les magasins dé l’ville ! Infin, alle a treuvé ! Ouais, alle a treuvé ! Alle acate eine paire ed sorlers ... aux 4 Suisses pa correspondance !

L'aut' jour, j’tos aveuc alle dins ein magasin ! Alle mé dit " Pusqu'in a l'même pointure, essaies ch’paire là pou qué j'mé rinte compte ed l'allure qu'j'aros ! " Mamére, ej berloquos ! J'tos là in équilipe instape su des sorlers à aiwuilles. A ch'momint là, ej' vos d'riére el vitrine quéquin qui m'ravisot, l'bouque overte aveuc des yeux ronds ! Ch'tot min patron ! El lind'main, j'l'ai vu à sin bureau pou m'n'armintation ! I m'a dit : " Té sais Tiot Rital, pou t'armintation, t'arpass'ras ! Té t'fais assez d'doupes el soir in f'sant el travesti ! "
Tiot Rital