un p'tit tour à Bruay

El mos passé, ej'sus allé passer eun' semaine à Bruay. el sam'di j'in ai profité qui faisot du solel pour aller em'prom'ner. allez v'nez j'vous améne faire un p'tit tour à pied avec mi. vous m'suivez?

j'ai démarré ed chez ma tante Louisa tout in haut d'ech'boulvard Basly, (ché là qu'ej' vas dormir quand j'monte à Bruay) jusqu'a ech'ti parc, là ej' sus rintré faire un tour pour m'armémorer mes premières amourettes , mes premières baisses à bouqettes in d'sous du saule pleureur, insuite ej' sus allé vire l'école Félix Faure chétot l'heure d'el récré cor plein ed' souv'nirs qui sont ar'monté al surface

insuite j'ai déquindu el côte ed' la cavée, pour atterir dins l'rue du vieux marché. là direction place Marmottan, là ej sus allé boire un verre à mo d'Autriche chez Marie Claute, insuite j'ai traversé l'rue pour aller m'in j'ter un au galopin à mo ed'min camrate Fernand.

insuite j'ai pris el rue Léon Noyelle pour attaquer el rue des Escaliers ej' voulos faire du lèque vitrines, mais comme y a presque pu ed magasins j'a eu vite fait d'arriver in haut d'el rue.

ed'là j'ai ar'déquindu l'av'nue ed la République toudis pas ed magasin in vu jusqu'ach' carrefour Lemoine, j'em' su arrêté ach' café qui fait coin pour em' désaltérer
ed'là j'ai voulu aller visiter el musée ed' la mine à Grosmy pas ed' chance ch'étot fermé

j'ai donc pris el pass'relle pour tarverser la Lawe, et direction el côte du 3 ej' sus passé devant l'églisse saint Martin el porte al'étot ouverte, mais j'en' sus pas rintré

j'ai donc ar'monté el côte jusqu'à l'rue d'Esplanate pour arriver rue ed Victor Hugo j'ai toudis pon core vu el moindre magasin à part les pompes funèpes Valembois mais ch'est pas el genre d'indrot que j'ai kère fréqunter
in passant devant ech'café tabac à côté ed mo Riska j'ai rincontré ech' tiot Marcel ch' nain qui passot à chés mason avec es mobylettte et sin barou pour vinte toutes sortes ed' bricoles, du chirache des vasinques etc..
j'ai bu verre avec li après ej' sus parti faire un tour au cim'tiére in passant par el' rue Paul Daguercart j'ai été dire bonjour à min camarate Serge Mayeux ech' fleuriste qui malleureusemint i a fait faillite victime li aussi à causse d'el porte Nord

du cim'tiére ej' sus sorti par el p'tite porte qui donne dins l'rue d'Marles ed' là ej' sus allé in boire un anciennemint ach'café Daniel et Mado, (qu'ej salue au passache) y avot pas un tchien

ed' la ej' su allé vire em' n'ancienne mason in bas d'el rue d'Bône, ech'l'homme i étot in train ed' bricoler es' carette j'ai ingagé el conversation avec li d'ech' coup là i m'a invité à boire eun' canette (jai pas pu ar'fuser)
cha m'a fait tout drôle d'ar'vire em' mason, ech'gardin.

eun' fos sorti ed' là j'ai rattrapé el rue ed' la Cavée j'ai passé devant el mason ed' l'ancien directeur du colléche Rostand monsieur Warou, ej sus passé par el cité ed l'espérance dù qu'em' ex femme al reste, j'ai pas osé aller buquer as'porte en sachant pas commint j'auros été archu et pi au bout ed'24 tr'ans soit qu'al m'aurot pas ar'connu ou al'aurot pu faire un malaisse.

voilà ch'est la fin du voyache retour rue Basly in arrivant ach' coin ô surprisse quo qu'ej' vos un magasin d'alimentation, cha do ete el seul qui reste au 3.

j'espère que vous avez fait eun' "bonne prom'nate in m'compagnie" pour conclure ej'veux dire que Bruay i a bien cangé malheureusemint pas din'l'bon sens !!!