Tiot Séyau et l'Caracole (conte pou infants)

Em’ mère, quaind j’tos tout jonne, pou m’indormir, alle avot ker (aimait) m’dire d’tiots contes. V’là l’histoire d’un tiot séyau d’infant (Tiot Séyau) et d’eine caracole (Bof).

Tiot Séyau et l’Caracole (l’escargot)

Tiot Séyau i s’arva à l’école. Su l’quémin, i kée (tombe) su Bof l’caracole :
- Eh j’dis l’bonjour tiote caracole, eduss qué t’arvas ?
- J’va à l’école !
- A l’école ? Té va à m’n’école ? Mais j’t’ai jamais rincontré !
- Nan, jé n’va point à t’n’école, ej va à l’école espéciale pou les caracoles !
Tiot Séyau est bin estoqué (surpris). I savot point qu’i avot d’z’écoles pou les carcoles !
- T’apprind à lire escargot ? ermeude (demande) Tiot Séyau
- Ouais bin seur et pis à compter.
- Té comptes aveuc tes dogts ?
- Mais nan ! Té sais bin qué j’n’ai point d’dogts ! Ej compte aveuc mes cornes !
- Escuse meu, j’dos min raller sinan ej va êt’ attargé ! El maîte d’école i m’méronnera cor !
- Eh bin mi j’sus d’jà bin attargé (en retard)! Té pourros m’printe, Tiot Séyau ?
- Bin sur ! Montes et rinte !
Et Tiot Séyau i prind Bof l’caracole, i l’rinte din s’dos et sitôt i coeurre (court)!
- Point si fèle (vite), Tiot Séyau, em’ coquile alle est bin tême (mince), alle va s’brisier !
- Ouais mais j’dos coeurrir pou êt’ aheuré (arriver à l’heure) ! J’ai eine idée pour t’mette bin au rado (à l’abri) et in pusse bin à l’coïette (au chaud, à l’aise)!
L’tiot Séyau i ramasse du mousset (mousse). I’in met din l’fond d’li et i in met alintour dé l’caracole. I’arpart en coeurant. Bof l’Caracole alle n’est pus allotée (secouée) mais l’mousset li rinte rintre dins s’n’eul !
- Arrêtes-te ! crie Bof. L’mousset i m’catoulle m’n’eul !
Tiot Séyau n’intind rin et continue d’coeurir. D’un cop Tiot Séyau i vot edvant li eine ripopée d’caracoles traverser l’quémin. I veut point l’z’écrazer ! I saute mais in arkéyant, berdouf ! i rétale à tierre. Bof l’caracole alle est ruée (jetée) à quéques mètes pu lon su l’hierbe ! I’atterrit sin s’coïcher (blesser) !
- Merci, Tiot Séyau ! crie Bof. J’sus arrivé d’vant m’n’école. Mais commint t’as adviné l’indroit duss qu’alle sé treuvot ?
Tiot séyau i frotte ses gampes écorchées. I’a mau mais i n’déclaminte (lamente) point. I’a rien adviné du tout !Sitôt i invinte eine tiote mintirie (mensonge) :
- Quaind j’ai ravisé (vu) l’file d’caracoles, j’ai busié (pensé) qué t’n’école alle n’étot point lon (loin) répond in soriant Tiot Séyau.
l est bénache (heureux) d’avoir rindu service à s’nouviau comarate, Bof l’caracole !

Mais à ch’momint là, j’tos d’jà à mitan indormi et au lon, j’ai intindu comme din un rêve, l’vox bin terte (douce ) dé m’manman m’dire in m’apochinant (caressant) douch’mint m’tiête
- Acoutes fieu, i fot toudis rinte service aux gins !
Tiot Rital