Les jardinsBruay mai 2007 rue de Chatellerault (2) .
par loumarcel le, 17/05/2007Pou t’réponte Minloute, nan je n’sais pon, ch’est l’première fos que j’vos cha, l’dernière fos que j’sus passé par là ch’étot i a 9 mos pour l’décés de m’belle mère bin cha n’existot pas, mais j’pinse comme ti cha dot ête pour chés personnes âgées, et in dirot qu’i in a pas à toutes chés portes.
A chaque fos qu’j’armonte à Bruay, j’arpasse par m’ rue pour vire si j’connos cor quiqu’un mais j’vos personne, i un a pus un qui ju dins l’rue pourtant d’not’ temps ch’étot vivant. Hé ouais ch’est comme cha.
A vire la hauteur ed chés marches cha dot pas ête loin de m’maison dû que j’restos, mi ch’étot au 26.
Ravisez bien chés marches su l’photo, in bas i in a deux qui sont plus claires, ch’est passe i a inne cinquantaine d’années, i z’ont déchindu, rabaissé l’route d’50cm, cha s’vot aussi in bas d’chés murs, avant chés rucheaux i z’étot’nt fait avec des gros pavés, i z’étot’nt pas tout à fait d’aplomb et quand in faisot ch’rucheau l’sam’di que ch’garte i ouvrot l’iau in haut de ch’coron bin fallot l’faire aller ch’balai intre chés pavés pour que cha soit prope.
Ouais j’min rappelle, ch’étot l’première fos que j’veyos des gros engins comme des rouleaux compresseurs avec inne grosse reule in fer devant et deux aussi in fer ed chaque côté, i avot aussi pour aplanir in engin avec inne lame ed travers qui poussot tout pour niv’ler chés caillaux, des pelleteusses etc… Je m’métos ale porte à batans, vous savez chelle in deux morciaux ou ale fenète et j’ravisos chés ouvriers travailler.
