em' gamelle à Suzanne Blin

J'sus allée à l'maternelle et in primaire à l'école d'ches filles del cité 5, à Grenay; j'ai fini dins l'classe du certificat d'études, aveuc eun' jonne institutrice qui v'not in scooter et qui s'appelot Melle Jannequin
al nous a préparées (in étot 3 ou 4) à intrer in 6ème ach' cours complémentaire Suzanne Blin, à Bully: el soir, à l'étute al nous faisot faire des d'voirs in supplémint d'ches autes tiots qui allotent passer leu certif
mi, j'ai point min certif : j'l'ai jamais passé !

A l' rintrée 1957, direction Suzanne Blin in vélo, par tous ches timps : qui pleuvot, qui vintot, qui neigeot, fallot pédaler
et l'pire ch'étot quind y avot du verglas et qu'in devot ténir nou vélo d'eun' main et essayer d'rester d'bout !
in n'a connu des avintures avec ches copines ed Grenay ! in s'attindot et in faisot l'rout insembe.
mi, cha m'a fait in bien fou : j'étos pas grosse, j'avos des mollets d'co, mais cha m'a indurchie ! j'étos jamais malate !
j'passos à travers ches épidémies ! vive el vélo !

J'em souviens qu'i avot point d'cantine à ch't'époque là
mais pou ches infants qui pouvotent pas rintrer à leu mason, i avot eun' salle in rintrant dins l'cour à nou gauche, du qu'ch'est qu'in pouvot minger l'midi.
Pou queques francs, in nou servot del' soupe et un verre ed tiote bière.
Nous, in ammenot nos gamelles préparées par nou mères qu'in déposot in arrivant l'matin et eun' femme al les faisot archauffer au bain-marie dins des grindes bassines avint d'minger !
Em' gamelle al étot ovale, in aluminium et min père i avot gravé min nom su ch'couverque ! quind in l'ouvrot, i avot in tiot compartimint du qu'in mettot l'viande .
In étot pas gramin à minger su plache, et ch'étot in hiver qu'i avot du mond' donc ch'étot plus bruyant.
Em' mère al préparot des "plats-qui étotent-incor-meïeux-quind iz' étotent-réquauffés": del' ratatoule, du rassacache, aveuc un tiot peu d'bouillon pou qu'cha seuche moins lourd, des nouilles aveuc del' viande hâchée.
I avot un sintimint espécial quind, avant d's'installer à nou tabe in ouvrot l'porte dech' réfectoire: toutes ches odeurs ed' plats mélingés, del soupe réquauffée, ch'étot c'qui frappot avant d's'installer à nou tabe.

In mingeot in parlant ed' tout, ed' rien et in échingeot les recettes ; ch'est là qu'j'ai découvert qu'in pouvot mette du chuque et du beurre dins chés macaronis .... am' mason, in n'les avot jamais mingé comme cha
j'lai dit à m'maman, in a goûté, in a eu querre et in s'y est mis !
Et pis, in partingeot, autour d'nou tabe : in échangeot eun' part ed' tarte à gros bords conte eun' part ed pain d'chien, eun' moléoffe conte un pouchki
et comme in avot des copines polonaisses et eune italienne, in invintot l'Europe avint l'heure par l'biais d'ches sucreries !

Quequefos, i avot in accidint d'gamelle : in n'avot eun' qui s'rinversot dins l'carnassière : ch'étot un drame pou ches cahiers mais pas pou l'copine passqu'in partageot nou gamelles et i'n' n'a jamais eu eun' qui a point mingé l'midi.....

Et pis après , "Phalempin" i a été construit et in a quitté Suzanne Blin, l'cantine et ... nou gamelles !