min pépère Pouchain (2) el guerre 14-18

I avot fait l'guerre 14-18 avec chés 3 autes frères qui s'suivotent tous in âge; i z'étotent partis 4 et i sont arvenus eque deux à Bruay.
Min grind père i parlot toudis del' grinde guerre comme d'eune tuerie qu'in n'devot jamais plus vir (mais i parlot pas gramint del deuxième , ch'est vrai qui s'étot pas treuvé dins l'batalle, ach'momint là i travaillot à l'abattache et i étot pu mobilisabe).
I racontot ches gaz , chés copains qui mourotent , chés boches avec qui i fraternisotent de boyaux à boyaux , el piquette qu'in leur donnot à boire avint d'aller à ch'casse pipe et qu'i avot in drôle ed ' goût...
Verdun , el chemin de Dames : i s'rappelot d'chés dates , d'chés heures , du nom d'ches gradés ; i in parlot sans colère mais i nous disot toudis , à m'tiote soeur et à mi , qu'si l'bon Dieu i avot vraimint existé i aurot jamais permis cha !
Quind i z'abordotent el sujet , mes deux pépères ,i s'disputotent toudis ... faut dire , qu'pindint ches années là, i z'avotent été insembe , sins l'savoir
- Grind-père Cadet , ch'étot l'matin , ch'loffensive , pas ch'l'après midi
- Vos y étotes pas , si vos dites cha , mi , j'y etos !
- Et mi aussi , j'y étos !
Et pis , ch'étot pas l'captaine X qui commandot , ch'étot Y
- Z'avez tout faux .... si je n'mabuse , vous étotes pas là !
Et i arfaisotent leu guerre pindint des heures !
El seule cosse qui les mettot d'accord , ch'étot l'timps qui faisot : "in étot ingelés , in infilot des capotes pad'zeur nou vareuses
et pis les " totos" qui nous mingeotent tout crus !"

I buvotent queque tiots canons , leus yux brillotent , et pis après , cha allot mieux
el paix al étot faite et i z'étotent prêts arcomincher à leu prochaine rincontre !

et nous , les tiotes filles , in écoutot , mine ed'd'rien , in inregistriot dins nou tietes et in savot tout ou presque su l'guerre avint d'l'avoir étudié in classe !

achteure y a pu d'poilus pou témoigner, mais mi , j'peux pas oublier !