Buquer, eune tradition d'mariache

Quand j’étos jone–homme, dins not' campane, si in avot eune copine ou un copain, défos les 2, qui s’mariottent ! chétot eune tradition d’aller " Buquer " pour leur faire Honneur.
L’jeudi soir chétot à mon d’eule file !(pasque l’velle du mariache, in aurot un peu géné chés préparatifs !) vu que souvint l’noce alle étot organisée par l’famile d’eule mariée !
Donc l’vendredi soir, on allot buquer à mon d’euch garchon, et l’samdi in armettot cha un tiot coup à l’sortie d’l'églisse quant’eule situation alle permettot, pasque chétot un peu dangereux not système !

Mi j’avos fait faire eune buquoire à 3 coups par euch maréchaux d’euche Pacault d’Hinges ; d’autes ont pu l’faire faire à l’atelier de l’fosse !
Fallot surtout du fer épais 50x50 ou miux 60x60 pour percher chés trous de charges et d’échappements.
A l’drogu'rie, on acatot du souffre et du chlorate de soude qu’on mélangeot juste avant de commincher à buquer ; cheux qui étotent préposés au chargement, i mettotent eune pétite cuillère eud’poudre dins chaque tro pis is’arculottent 3 m derrière chés buqueux !
là in mettot un poinçon aveuc un long manche dins ch’tro et in tapot aveuc in bon martiau such poinçon qui faijeot exploser l’poute !

in étot désfoes 5/6 à buquer cha faijeot un sacré bruit qui s’intindot à des kms ! Au bout d’1/4 d’heure on faijeot eune pose ; on rintrot
Boire un coup, on cantot, on racontot des cafougnettes ! après on allot ar’buquer
in ar’rintrot boire un coup , comme cha jusqu’à minuit, après on ne tirot pu !
Ché qu’aveuc 2 kg d’explosif on pouvot faire du bruit un bon momin ! et cha n’coutot pas si quer que des pétards !


din z’années 56/60 à cause d’la guerre d’Algérie, on devot s’signaler à l’gendarmerie qui tolérot qu’on buque pour un mariache comme cha i passotent aussi boire un canon ! pus-tot 2 ! i savottent vivre aveuc chés gins, z’ accouter ! et on les respectot plus qu’ast’heure !

Quand on avot des fins d’semaines aussi chargées (faut pas oublier qu’on travaillot tous les samdis matin) eh ben l’diminche, on étot contint d’pouvoir dormir un peu pu tard !

Bonjour Bébert, mi j'ai buqué inne fos à Divion, pour in mariach' d'inne nièce à mon del m'belle soeur Nelly, su l'route qui va à Houdain, in face de l'ferme
bin ouais j'peux vous assurer que cha fait du potin et del fumée, mais i fallot faire gaffe à c'qu'in faisot.
In avot pris des photos, j'va vire cha.