aller à l' école à pieds

Cheux qui comme mi restotent rue Gabriel Péri, prés d'eule centrale, et qui allotent à l'école à l'Bussière et devotent rintrer à midi pour minger ale la maison pasque y avot pas d'cantine, hé ben j'vous dis qu'in'avotent plein les bottes et ras du béret, in rintrant au soir!
Mi, s'su allé à l'Bussière, aprés la guerre j'avos fait un an d'maternelle à Gosnay

A l'Bussière , l'école des files ale étot in haut de l'rue des Hayettes, faijant coin avec el'rue Blanc pain, in face y avot l'ferme d'euch catiau dusque restot l'famile Hannequin, mais chétot pu eune cinse!
Pour chés garchons, chétot in face d'la Mairie,avec su l'coté gauche, la Poste (l'postière Mme Cadot ) l'directeur d'école Mr Drouvin i restot au fond de l'rue derrière la mairie (à gauche) s'file Thérèse! ou Marie Thérèse ale étot secrétaire à la Mairie.
Chés z'instituteurs:
Mr Hubert, un tiot rouquin sympa qui restot sus l'nationale in bas de ch'quémin rouche.(y avot un garchon Henri) et y avot Mr houillez un grand aveuc des grosses leunettes; i parait qu'i étot dev'nu myope à cause d'chés gaz lacrimogènes pendant chés grèfes in 36.
Quant Mr Drouvin i a eu l'artraite, y est v'nu un aute Directeur, un fier cul aveuc eune blousse blanque, t'auros dit un pharmacien! eune vraie brute avec chés jones (li, in'avot pas!)
ché pas eune raison pour nous taper aveuc sin poing sus l'figure ou
s'rèque sus l'bouts des dots!
Aveuc l'accord de chl'inspecteur d'académie, i nous a enseigné l'méthode active! plus de cours aveuc des liffes,
pour chaque matière y avot des grandes fiches accrochées ach'tableau! in devot écire in script, et tous les jours such'cahier, un dessin d'eune pache à l'encre de Chine et in couleur!
Ch'ti lal' y n'a gramin qui dottent s'in sou'vnir?
Et quant i a cangé d'auto! in a eu drot à des heures, et des heures, sus l'Dyna-PANHARD tout in alu!
eune semaine avant qu'i l'a archu, à chés récréations i nous faijot mette in line au fond d'eule cour, et fallot avancher squ'à l'aute bout in ravissant parterre pour ramasser chés daches qu'in avot perdu d'nous galoches!