Les jardinsNoël des p'tits infants, Ch Bruchet
par Marie-Claire le, 26/12/2006Noël des p'tits infants
poésie de Charles Bruchet
Qu'in crot ou non au pèr'e Noël,
Qu'in soit croyant ou athée,
Qu'i' pleuv', qu'i' vinte ou bien qu'i' gèle,
L'vingt-cinq décembr'e , ch't'un'e bell'e journée.
Ch'est un'e journée que l'on prépare
Avec un soin particulier,
Ch'est un'e journée où les avares,
Ouvr'ent un peu plus leur port'e monaie.
Papa, Maman, dins l'nuit d'Noël,
Guettent l'momint où les infants,
Dorm'ent enfin d'un profond sommel,
Pour installer tous leurs présents.
L'faut les vir…i'faut nous vir,
Autour de ch'l'arbre…à l'quéminée,
Installer, où, c'qu'in veut offrir,
Sera le mieux considéré.
Quéqu'fos, in cherchant dins l'armoire,
Les friandis'es qu'in a muchées,
In s'aperçoit que les bonn'es poires,
Sont pas ceux qu'in croyot rouler.
In est plus naïfs que les infants
Surtout quand in vot qu'les bouchées,
Qu'in voulot mett'e comme ornement,
Ont déjà bien diminué
Mais ! que ch'est biau d'vir un pétit,
S'lever et, d'un pas hésitant,
Aller découvrir c'qu'in a mis,
Qui peuplot p't'êtr'e ses rêves d'infant.
Quand du paquet, tirant l'fichelle,
Il nous ravise un peu gêné,
A-t'il alors, du pèr'e Noël,
Découvert le tendre secret.
Et enfin i'sorte un nounours;
Instinctiv'mint , par protection,
Bien vite il l'approche'e de s' frimousse
Un p'tit infant ch'est toudis bon.
Ah ! si seul'mint ce p'tit bonheur,
Partagé dins grammint d'foyers,
Etot gouté par d'autres cœurs,
Que l'existence n'a pas choyés.
Sur ce, mes gins, jouyeux Noël,
Mais pinsez aux déshérités,
Pour qui la vie n'est pas bien belle,
Sans un peu de fraternité.
